Игі істер марафоны: Елордалық еріктілер «Қамқорлық мекенжайы» акциясын жалғастыруда

21.05.2021 18:32

Ел Тәуелсіздігінің 30 жылдығына арналған жалпыреспубликалық «Игі істер марафоны» аясында елордалық еріктілер мұқтаж жандарға азық-түлік себеттерін жеткізіп, «Қамқорлық мекенжайы» акциясын өткізуді жалғастыруда, деп хабарлады қала әкімдігінің ресми сайты.

Жыл басынан бері акция аясында 4 000-нан астам азық-түлік себеті жеткізілді. Оған түрлі кәсіпорындар мен қоғамдық ұйымдардың меценаттары жұмыла көмектесіп келеді. Ал қаланың автоволонтерлері азық-түлік себеттерін жеткізуге атсалысады.

Волонтерлік ұйымдар 9 мамыр – Жеңіс күні құрметіне тыл ардагерлеріне, жалғызбасты зейнеткерлерге азық-түлік себеттері мен естелік сыйлықтар жеткізді.

Азық-түлік себеттеріне негізінен жалғызбасты қарт зейнеткерлер, әлеуметік аз қамтылған отбасылар мұқтаж.

Қала тұрғындары мұқтаж жандарға қажетті азық-түлік пен дәрі-дәрмек жеткізіп, белсенділік танытуда. Елорданың кейбір тұрғындарына азық-түлік себеті, кеңес беру, қар күреу секілді көмек қажет. Еріктілер мұндай мекенжайларды тұрақты назарына алады.

Осылайша, бүгін еріктілер Сарыарқа ауданында жүйелі негізде көмек көрсетілетін жалғызбасты зейнеткерлер мен көпбалалы отбасылар тұратын мекенжайға барып қайтты.

Елордада акциялар санитарлық нормалар мен талаптарды сақтай отырып өткізіледі.